قلعة صلاح الدين الأيوبي
بسم الله الرحمن الرحيم أمر بإنشاء هذه القلعه الباهره المجاورة لمحروسة القاهره التي جمعت نفعا وتحسينا وسعة علي من التجأ إلي من ظل ملكه وتحصينا مولانا الناصر صلاح الدنيا والدين أبو المظفر يوسف بن أيوب محي الدين أبي بكر محمد خليل امير المؤمنين علي يد امير مملكته وعين دولته قراقوش بن عبد الملك المالكي الناصري في سنه تسعه وسبعين وخمسمائة (٥٧٩ هجرية أي ما يوازي ١١٨٣ ميلاديه)
ده النص اللي مكتوب علي باب القلعه المدرج اللي موجود في الضلع الغربي من القلعه وعلي فكره ده كان الباب الرئيسي لدخول القلعه سابقاً
طيب إيه بقي حكاية القلعه دي وقصتها إيه؟
فضوا نفسكم وهاتوا مشروبكم وتعالوا نحكي واستحملوا شويه عشان القصه طويله حبتين
سنه ١١٧١ م كان صلاح الدين وزير الدوله في عهد الخليفه العاضد لدين الله قرر إنه يعمل سور كبير وضخم حوالين القاهره كلها يحميها ومش القاهره بس لأ والإسكندرية كمان بس بدأ بالقاهره عشان كانت العاصمه ومقر الحكم طبعاً هو كان موجود سور في الوقت ده بس صغير وضعيف وده كان في الجزء الغربي من القاهره، فا انتدب الأمير الطواشي بهاء الدين قراقوش الأسدي عشان ينفذ السور العملاق ويكمل السور اللي كان موجود.
تم الإنتهاء من أعمال البناء للسور الجديد وتجديد السور القديم سنه ١١٧٤ م في الوقت ده الخليفه العاضد توفي وتولي الحكم السلطان الناصر صلاح الدين الأيوبي أمير المؤمنين
قرر السلطان صلاح الدين الأيوبي إنشاء حصن منيع وإختار موقع عالي علي جبل المقطم إسمه قبة الهواء بجوار مسجد سعد الدوله وأمر ببناء القلعه في عام ١١٧٤ م
تم تعيين الأمير الطواشي بهاء الدين قراقوش الأسدي ليصمم رسومات القلعه والإشراف علي تنفيذها وبدأ ينفذ عام ١١٧٧ م فضل يبني فيها حتي عام ١١٨٣ م ولكن لم ينتهي منها كلها كان باقي فيها اجزاء لما يتم الإنتهاء منها مثل القصر
بعد افتتاحها رسمياً تم بناء قصر داخل القلعه ليكون مقر إقامة الحاكم وبرضه ده كان بأمر صلاح الدين الأيوبي ولكن يشاء القدر إن صلاح الدين الأيوبي ينتقل إلي جوار ربه قبل الانتهاء من قصر الحاكم وبذلك يكون أول حاكم سكن القلعه هو السلطان الكامل وفضلت مقر الحكم حتي عهد الخديوي إسماعيل بعد كده تم نقل مقر الحكم ومقر إقامة الحاكم لقصر عابدين
تم بناء القلعه علي أحدي قمم الجبال المنفصلة عن جبل المقطم، وده عشان تبقي كاشفه أطراف القاهره ولأسباب عسكريه مالناش دعوه بيها ما تستغربوش لما بقول أطراف القاهره عشان زمان لما بنوا القلعه كانت مبنيه علي أطراف القاهره فعلاً مش في وسط المدينه زي دلوقتي، كانوا بيسموها زمان برضه قلعة الجبل، أو قلعة الحصن
تعتبر واحده من أهم معالم القاهرة عشان هي لا تشبه أي حصن علي مستوي العالم كله قديما وحديثا وده اللي خلي منها أحد أهم المزارات السياحية في القاهرة
طيب بس كده؟ يعني هي تعتبر واحده من المزارات السياحيه عشان خاطر تعتبر حصن؟
لأ طبعاً هي مليانه متاحف وحاجات اثريه كتير تعالوا نشوف فيها إيه
١- مسجد محمد علي
يعتبر أكثر معالم القلعة شهرة، ويطلق عليه برضه جامع المرمر
المرمر ده نوع من أنواع الرخام النادر والمسجد ده اتسمي بجامع المرمر نسبه الي نوع الرخام اللي تم وضعه في الجامع،
محمد علي باشا بدأ في بناء المسجد ده سنة 1246هـ / 1830م وفضلوا يبنوا فيه لمدة ١٨ سنة وخلصوا البناء بتاعه ساعة وفاة محمد علي باشا 1265 هـ / 1848م وساعتها تم دفن محمد علي باشا في المدفن اللي عمله لنفسه داخل الجامع.
٢- قصر الجوهرة
اتبني القصر ده سنه ١٨١٤ عشان يبقي مقر إقامة الوالي أو حاكم مصر بدل القصر القديم وده كان بتعليمات من محمد علي باشا وسمي القصر بإسم الجوهره نسبة الي زوجته ومكانه جنب جامع محمد علي باشا، جوه القصر جناح خاص لإستقبال الزوار وإقامتهم، بعد كده تحول القصر عشان يبقي متحف.
٣- متحف الحديقة الأثري والمحكي
تحفة القلعه بجد
ده متحف أثري مفتوح (سماوي يعني) مساحته ٩٠٠٠ متر مربع بيحتوي علي الآثار الإسلامية زي أعمدة وتيجان وأزيار من عصور أيوبية ومملوكية وعثمانية بالإضافة إلى مجموعة شواهد تحمل كتابات خطية بالكوفي والنسخ وفيه كمان أبواب ولوحات تذكارية تاريخية.
الجدير بالذكر إن المتحف ده بيقام فيه مهرجان موسيقي كل سنه إسمه مهرجان الموسيقي العربيه أو مهرجان المحكي المهرجان ده بيستمر حوالي ١٥ يوم لشهر وبيكون ميعاده في شهر أغسطس كل سنه وبقاله ٣٠ سنه.
٣- متحف المركبات الملكية
تم إفتتاحه سنه ١٩٨٣ م، والمتحف عبارة عن قاعة واحدة معروض فيها ٨ عربات شاركت في مناسبات رسمية في مصر أثناء حكم أسرة محمد علي، أهم عربيه فيهم اللي ركبتها إمبراطورة فرنسا (أوجيني) لما جت زيارة لمصر عشان تشارك في حفل إفتتاح قناة السويس في ١٧ نوفمبر عام ١٨٦٩