*لكثرة الاسئلة عن الرحلات في بوكيت بحاول اختصر لكم واضع لكم افضل 3 رحلات من وجهة نظري وممكن البعض يخالفني الرأي*
# اغلب الرحلات من 8 صباحاً الى 5 عصراً طبعاً الرحلة لها عدة شركات وكلها تعطيك نفس الخدمات والاكل والسناكات تقريباً وكلها قارب سريع وهو الافضل والمكاتب كثيرة كاسر وخذ افضل سعر #
1- جزيرة بي بي وسعرها مايزيد عن 1300 بات :
⁃ اول نقطة جزيرة مايا باي حلوه وجميله وتجلس فيها مايقارب 40 دقيقه .
⁃ النقطة الثانية تمر جهة القرود وتجلس مايقارب 20 دقيقه .
⁃ النقطة الثالثة تروح جزيرة بي بي وتجلس فيها مايقارب ساعه و20 دقيقه ويكون الغداء فيها .
⁃ النقطة الرابعه مكان تجمع للسباحة تجلس فيه تقريباً 30 دقيقة .
⁃ النقطة الخامسة سنوركينق تقريباً 30 دقيقة .
⁃ النقطة السادسة واخر جزيرة تم عليها تجلس فيها ساعه سناكات وفعاليات وجيتسكي .
بعد ذلك تتجه الى المارينا وعلى الباص للفندق .
2- جزيرة جيمس بوند وسعرها مايزيد عن 1300 بات :
⁃ اول نقطة توصلها تنزل من القارب وتركب في قارب مطاطي صغير تتمشى بين الصخور وتستمع فيها جداً تقريباً 40 دقيقة .
⁃ ثاني نقطة هي جزيرة جيمس بوند تجلس فيها مايقارب 30 دقيقة ومكان حلو وجميل .
⁃ ثالث نقطة تصل الى قرية فوق الماء جميلة جداً ويكون الراحه فيها والغداء مدة ساعه وربت تقريباً .
⁃ رابع نقطة جزيرة فيها كهف ومناظر حلوة وجميلة وتجلس فيه مايقارب 30 دقيقة .
⁃ خامس نقطة اخر جزيرة فيها فعاليات وجيتسكي وسناكات وتجلس فيها ساعه وربع .
بعد ذلك تتجه الى المارينا وعلى الباص للفندق .
3- رحلة رافتينق خارج بوكيت بالسيارة ساعه ونص وسعرها 1200 بات :
⁃ اول نقطة تصل الى مكان فيه كافيهات ومطاعم وتجلس 30 دقيقة وحولك القرود .
⁃ ثاني نقطة تصل الى مكان الفيله وتاخذ فره على المكان وانت فوق الفيل وممتعه جداً . وبعدها في نفس المكان تركب زيب لاين وكلها 40 دقيقة .
⁃ ثالث نقطة التجديف طبعاً الاساس 5 كيلو بدون مرتفعات ونصيحه اتفق مع المكتب وقله ابي 7 كيلو تكون امتع جداً وتزيد مبلغ 200 بات .
⁃ رابع نقطة دباب برية بمكان جميل تقريباً 35 دقيقة .
⁃ خامس نقطة تذهب الى الشلال وتستمع في المكان وتسبح وتجلس تقريباً 40 دقيقة .
بعد ذلك تركب الباص وترجع الى الفندق .
نصيحة اذا انت جالس في بوكيت اكثر من 6 ايام خلها يوم رحلة ويوم مكان ثاني مثلاً مدينة بلو تري بوكيت او انداماندا المدينة المائية الجديدة او فانتازيا او تسوق ومدينة بوكيت القديمة .