تقرير زيارتي لدبي من تاريخ 31 ديسمبر الى 5 يناير
أولاً: السكن في فندق ميلينيوم البرشا بالقرب من مول الامارات وحجزنا كان شامل الافطار
ثانياً: الناقل الخطوط السعودية (التذكره ذهاب وعودة مجاناً) + الخطوط الإماراتية شخصين بمبلغ 5680 ريال
ثالثاً: السيارة استئجرنا من الوفاق اخذو علينا مبلغ 1000 ريال تأمين ودفعنا إجمالي مع التأمين 2100 درهم بعد ما استخدمت خصم 15٪ لموظفي الخطوط السعودية
اليوم الاول الجمعة 31 ديسمبر /
وصلنا الى دبي حوالي الساعه 4 بس اخذ مننا وقت استئجار السيارة وضيعنا شوي عشان نستلمها بعدين رحنا للفندق سوينا تشيك ان وطلعنا نتعشى في دبي مول عشان بعدها نطلع نشوف احتفالات رأس السنة والالعاب الناريه عالبرج واخذنا من مطعم قونايدن ومطعم ثاني اظن اسمه حاتم في منطقة المطاعم خلصنا وتوجهنا مع افواج من البشر للخارج عشان نشوف الاحتفالات بدأت الاحتفالات وكان الوضع زحمه بشكل مو طبيعي بصراحة وقتها تذكرت يوم الحشر ادري مو وقته بس لأن كل واحد ماعنده غير مكان رجلينه والناس لاصقين ببعض وانا حلفت اني مارح اطلع الا وفيني كورونا لأن كان زحمه مو طبيعيه
خلص اليوم على خير تعبنا شوي وضيعنا لين لقينا سيارتنا لان وقفناها بعيد شوي بس انتهت على خير ورجعنا الفندق متكسرين من كثر مامشينا
اليوم الثاني السبت 1 يناير /
خصصنا اليوم هذا للتسوق بالإمارات مول تغدينا بمطعم حلبي اكلهم لذيذ جداً واجواءهم حلوه بالمطعم بعدين طلعنا نستكشف المول ولفينا فيه شوي وطحنا بغرامه حبيناه اكثر من دبي مول يمكن لأن قريب من فندقنا بعدها طلعنا منه عشان الاجواء كانت مطر ماتتفوت وقلنا نرجع نكمل تسوق بعدين لفينا بالسيارة بمدينة جميرا ونزلنا سوق مدينة جميرا الشعبي كان حلو للتغير تفرجنا وطلعنا كملنا لما المارينا ودخلنا صراحة جداً جميلة الابراج حولك بكل مكان والأجواء مطر وشجر الكريسماس بكل مكان حولك اخذنا قهوة من ستاربكس وختمناها عشان تكون مواقفنا مجانيه بعدين طلعنا ورحنا لذابوينت تمشينا فيه واستكشفناه وشفنا عروض النافورة بعدها حاولنا ندخل فناجين بس كان جداً زحمه ف دخلنا محل ثاني اسمه JUNIPER حق شيش ومعسلات ماخذنا منه اكل بس شيشه خلصنا وطلعنا كملنا مشي وبعدين حركنا والأمطار ماوقفت يومها رجعنا للإمارات مول لفيناه تقريباً كامل وبعدها جلسنا ريحنا بكوفي leto وبعدها طلعنا منه عالفندق
الاحد 2 يناير / فطرنا بالفندق بعدين توجهنا الى اكسبو وصلنا المواقف ومن هناك اخذتنا باصات لموقع اكسبو دخلنا واخذنا تذاكر العاديه الشخص بـ95 درهم بعد التذاكر في الدخول حاطين تفتيش زي حق المطار حطينا اغراضنا وشنطنا ودخلنا ووريناهم جوازاتنا الصحية والجرعات واستغربنا التشديد بس كانو يطالعونها بسرعه ويمشونا عكس باقي دبي ماحد يطلبنا شي .. كنا جوعانين ف أول شي سويناه دخلنا مطعم اسمه قراند بيروت اكلهم عادي بس كان اقرب شي لقيناه
دخلنا جناح تركيا كان بسيط وعادي جداً مافيه شي غير شايب يسوي قهوة تركية وبقلاوه بس كانت لذيذه بصراحة بعدين قعدنا نلف نحاول نفهم المكان عشان ماعندنا غير يوم واحد ومانبي نضيعه بالحركة اخذنا فكرة بعدين قررنا نتحرك جهة جناح السعودية لان كان اهم شي بالنسبه لي دخلناه بعد زحمه شديدة وكان غايه في الجمال انبهرنا وطول الوقت مبسوطين ان هذا شكل جناحنا طلعنا منه ووقفنا ب كازاختسان كان جداً عادي والكيو حقه مايتحرك بطيء جداً وكملنا بعده دخلنا اكثر من جناح ناسيه الترتيب بس كان مدغشقر والمالديف وموزنبيق وجناح اسبانيا وقطر واليمن وطاجيكستان والعراق كان جناح سنغافوره والمانيا مقفله يومها ف مادخلناها
وبنهاية اليوم دخلنا ساحة الوصل وكان فيها احتفال الميلاد اجراس واشكال وانوار كلها رسومات تخص عيد الميلاد كان مرا حلو ومبهر راح ارسل مقطع بعد التقرير له
ولما خلصنا منه رحنا للـJBR وجلسنا بكوفي يلسه المكان كان جداً جميل وواسع واجواءه لطيفه خلصنا ورجعنا الفندق